AIW024: Sifac: Moulkin Puhsisacl by Lipan Welly

May 14th, 2016

Alu In Wednesday kolyuck sel Lipan Welly

Wednesday May11 2016
Sifac: Moulkin Puhsisacl
Mwe Read: Micah 6:6-8;7:18,19

Sifil paing kowos nuhkewa followers ke Kahs In Kol kewana Kosrae ac abroad. Mwe kahsruh se lasr nuh ke Wednesday inge fahk muh "Moulkin Puhsisacl," oasr in Micah 6:6-8, ac 7:18-19. Kuhsahl Micah, Mwet Pahluh, pa inge nuh sin Mwet Israel. Tukin elos ilyak nuh Fuhlan Wuleacng (Canaan), elos sifil fahsr liki ma luhngse luhn God. Ohinge, Leum God el sapkin Micah elan fahk nuh selos in esam molelah Lal ke fuhfahsryucsr lalos Acacia nuh Gilgal. Ke Mwet Israel inge long, elos auliyak ac siyuck lah mac Leum God El enenuh elos in oruh? Lah elos ac use cow fuhsr wo emeet in mwe kisac fihrihr nuh sel? Kuh Lah elos ac use puhs liki sie tausin sheep mokul? Lah God Elac enenuh in puhs liki singucul infacl in oil in olive? Kuh lah elos ac kisackin wounse natuhlos in moli koluk lalos? Ke Micah el lohng el tohpohkuhlos lah Leum God el fahk tari mac wo elos in fahsr kac. Elos in oruh ma suwohs, moulkin lungse pacl e nuhkewa, ac in inse puhsisacl yurin God. Ac wacngin sie god oana Leum God, suc yohklacna nuhnak muhnahs, luhngse, ac pahkotwen la. El futungyac ma koluk lalos nuh ye niacl, ac supwaclah nuh yen loallacna in meoa. Mwe kahsruh se inge sifil ahkesamakinye kuht ke fahk lal Samuel nuh sel Tokosrah Saul ke Saul el tiac ahkos ma God El sapkin nuh sel, suc oasr in I Samuel 15:22, Ahkos wo liki mwe kisac. Leum God El kena kuht in ahksol. Tuhsruhk, El puhsisaclacna in sifil eiskuht kuht fin auliyak pwaye ac fohlohk nuh yohrohl. Oacyacpac, kuht in esam lah wacngin mwe kisac (ma wacp) lasr El enenuh meyen kuht tiac sifil moul ke ma sap, ac ma nuhkewa ma Lal. El enenuh muhkena ahkosten lasr tuh Elan utyak nuh in kuht, tuh Ngun Lal in kol kuht nuh ke moul ma pahtpaht!

00:0000:00